الاجواد والانذال

لجواد عندهم عندي اقدار عضيمه ***** ولندال مالهم عندي شرف لاقيمه

لجواد عندهم عندي اقدار بزايــــد *****   لجواد اصل ماهم ملمدين لمايد

لجواد وين ما تمشي نباهم شـــايد***** لجواد جودهم كيف السحاب وغيمه

لجواد هم عمار الوطن ربي رايــد*****  عطاهم المولي من ارزاق نعيمه

الكلام وين مايسرح عليهم عايـــد***** ان غاب ذكرهم راي الافكار عديمه

ولنذال كيف ترقيعة التوب البايــد *****مغير مضيعه كان الهدوم قديمه

ولنذال ما يعيشو بغيــــــــر سنايد***** لاعرق يندي لاعقول فهيمه

ولنذال من وراهم ماتنـــال افوايد ***** تقال دم منطقهم مخالف ديمه

بيعهم معوض والاتمـــــان زهايد ***** خير من ندام يركبوك جريمه

لجـــــواد جــــــود وهمــــــــــــــه ***** لجواد جلاية ضبااب الهمه

لجواد صوت في الميعاد دوم مسمي ***** لجواد في الشدايد يملكوا الغريمه

لجواد في النوايب توب ضافي كمــه ***** ولاعندهم ختله ولا تبريمه

لجواد عهددهم واجــب ولازم تمـــه *****ولا من اصحاب الفتن لا النميمه

لجواد فكر كلمتهـــــم الشــــمل تلمه*****حلالة المشاكل والعقول حكيمه

داري ولــد الاجــواد راك اتدمــــــــه ***** لجواد هم شعاع الفجر في التجهيمه

ينشا ولدهـــــــــم والكرم في دمـــــه *****مع رفقته تعرف امور عضيمه

لجواد جودهـــــم منهل غزير الجمه ***** لجواد ورد يعجب منضره ونسيمه

والانذال رفقتهـــــــم تسـبب غمـــــه ***** ويقل النضر وتسيرله تعتيمه

خبيث طبعهم فيهم اقـــــــلال الذمــه *****وفيهم اللي في وجوهم تظليمه

وفيهم اللي ع النـــــاس فاتــــح فمه*****وداير ولد الاجواد دوم خصيمه

ومنهم اللي مـــــــاله غلب في ظمـه***** وان كانك قصدته تصيرلك تنديمه

يرجف ان جـــــــاك تول واخد حمي ***** شحاح نفس مافيهم قلوب رحيمه

لجــــــــــــــواد ما ننســـــــــــــــاهم *****لجواد جودهم رافع لفوق نباهم

عليهم كلامي حبس ما يخطـــــاهم***** لجواد وجه باسم واليدين كريمه

لجواد يعزموا ويشاركوك عشاهم ***** يجودوا بما موجود في التقديمه

لجواد يعجبك تخطيطهم وارياهــم***** ولا يظلموا لا لغير يرضوا ضيممه

ان جيث بالمحبه الصافيه تسعاهم***** وان جيث بالخطا تعاود بقلة قيمه

لجواد يا صاحب ان كنت معاهـــم***** سعيد حط ما ترجع الا بغنيمه

ولنذال مكــترهم عددهــم تلقاهــم ***** ماعمرهم طقو الطريق سقيمه

كيف التعالب مــــــاكرات انياهـــم *****صحيح وجهه ما يعرفو الحشيمه

ان كان مصلحتهم فيك يا مبهاهـم *****خفاف عظم غير انده ايجو خديمه

وفيك يشمتو كانك عقبث وراهــم *****ولغيرك ايدمو ويشتموك شتيمه

اجعنهم فدا  لجواد هم وضناهــــم***** هم يكملوا ولجواد يبقوا ديمه





الشاعر شاكر الهوني