سجّلتك_غياب

سجّلتك_غياب  
لا_عذر_ينفع_لا_تفيد_اسباب
المرة_هذي
جايني_تأخير
  وين_كنت_بالله_وفيش_اتدير
ومن قبل حذّرتك وكم تحذير
 لا اشقيت بي ولا حسبت احساب
واضح انك متعمده التقصير
معاي ونا الّي بطيبتي نحساب
مع الوقت تسّقّم وتبقىٰ خير
 نين فيك ظنّي يا اخسارة خاب

المرة_هذي
 سجّلتك_غياب
لا_استآذنت
 لاقلت_ناوي_تغيب_لابينت
لا عمر مرة معاي صادق كنت
ونا في كل مرة نقول يمكن تاب
من قبل ياما خاطري حننت
باعذار جايبها وماتنجاب
الّي املفقة تلفيق زين وزنت
لوما الملامة نقولّك كذّاب
تبّي الصراحة راك عندي هنت
      ولا عاد منك نا انريد جواب

المرة_هذي  
سجّلتك_غياب

عقاب_اظروفك
  لاانريد_نسمع_لااريد_انشوفك
ولو كان في تكمله معروفك
     بيني وبينك تقفله هالباب
لا عاد تجيني لا تهز اكتوفك
  ووفر علي روحك نصيب اتعاب

المرة_هذي
 سجّلتك_غياب

اجراء_خذيت
 ويكون_عندك_علم_راك_اخطيت

بيش نعذرك للأسف ما خليت
   حتى وهو طبع الهوى غلّاب
لاصنت ود ولا غلا عدّيت
     لاحن عندك لا وفا تكساب
علي ما جريت  فيك ما طقيت
   ثاريتني نجري ورا السراب
وكان عـ الرجا ياطول ما راجيت
    يا اخسارته فيك الرجا ماجاب
واليوم صفحتك راني خلاص طويت
     بناءً عليه وانتهى الكتاب
والله لو عـ الجمر حافي جيت
       والعين تذرف دمعها سكّاب
ما تهمني اجدّيت ما اجدّيت
      لو بين ديك تجيبلي السحاب
اسمك شطبته درتله Delit
      الّي كان في اول قائمةالاحباب
وقبل ما نختم بآخر بيت
    للّي ايتابع في والشباب
سوا سمعت ولّا ها الكلام قريت
        التعليق ماتنسى ودير اعجاب
تفاعل معاي انقولّك صحيت
   ادعم الصفحة وضيفلي الاصحاب
وارجوا جديدي كان ما انحطيت
  في قبر موحش شين تحت اتراب
وصلّوا معاي كيف ما صلّيت
     على الّي هدانا ودلنا الصواب
وعليه سلموا تسليم وآل البيت
        وجملة اصحابه الّي احذاه اقراب ﷺ
سجّلتك_غياب
 لاعذر_ينفع_لا_تفيد_اسباب
المرة_هذي

كلمات الصرماني